Ah, quet0 poulido journado !

 

Lou vue de Desèmbre  à la salo Capeau de Vedèno fuguè de l'avis de tóuti, uno chanudo journado !

Se sian coungousta d'uno bono anchouiado emé li lièume de sesoun, pièi de la gardiano de tau, alestido pèr lou bouchié de Vedèno. Li sieto emplenado di trege dessèr fuguèron tambèn apreciado : uno alo de rasin, uno mandarino, de nose, de dato, de figo e d'ambrico se, de pasto de coudoun, de bescue i castagno, de nougat negre e de blanc, de papihoto, d'arangeto ( rusco d'aranjo counfido e cuberte de choucoulat) de cacho-dènt is amelo e avelano,e de naveto ( acò fai quatorge, mai li fai ren). Tout acò fuguè arousa de bon vin blanc e rouge pièi de clareto..

Mai ço que nous agradè bèn, quouro aguerian acaba nòsti dessèr, siguè d'aculi li dos couralo !

Es lou «  Roudelet voucau de Bedarrido » que faguè soun espetacle d'en proumié, em'un fube de cansoun, e mai que pèr d'ùni, avien vertadieramen fa uno messo en sceno, e vous afourtisse qu'acò èro tras qu'amusatiéu ! Es coum'acò qu'avèn vist arriba «  Fredi » e soun veloumoutour pèr carreja Fino au balèti ; i'aguè perèu lou maridage, pièi la sceno dóu pichot que voulié pas manja sa soupo...

A la seguido, fuguè la couralo de Castèu-Nòu de Gadagno que nous baiè un grand moumen de cant poupulàri de Nouvè, acoumpagnado au piano. Moumen tras qu'agradiéu que nous a endraia dins l'estrambord Calendau. E pèr acaba, li dous couralo se soun rejounto sus la sceno pèr faire clanti la Coupo Santo … Quet bounur !

Pèr la Chourmo dóu Pont de Garanço qu'avié un pau bagna camiso pèr alesti tout acò, lou countentamen de tóuti, que siegue li sòci o li cantaire, e l'oundado calourento que nous agouloupè tout de long d'aquelo journado fuguèron noste recoumpenso.

A l’an que vènt !                                                       Michello

Lou maridage !

Lou pichot que voulié pas manja sa soupo, e soun paire, maucoura !

Lou Roudelet Voucau de Bedarrido

La couralo de Castèu-Noù-de-Gadagno