La crounico dóu tèms ...que passo...
30 de Desèmbre: Enfin l'ivèr emé quàuqui bòni jalado que soun necite pèr assani l'èr e tua li bestiouleto destrùssi que soubravon encaro meme dins lis oustau coume li mouissau. Jamai coume aquest'an m'ère facho pougne au mes de Desèmbre ; cade niue venien m'enfeta mau-grat li poutingo de repous.
Lou tèms a pas fa menti lou prouvèrbi ; me souvene que pèr Pasco avié fa un tèms de calandro, e pèr Nouvè a fa un tèms dóu diable em'aquéu mistrau jala que boufavo coume un perdu :
Nouvè au jo, Pasco au fìò !
Enfin nous vaqui au bout de l'an, aquel an de malan, aquel an dóu bissèst que nous a rèn espargna, de la debuto à la fin, siéu urouso de lou vèire cabussa, emé l'espèr que l'an nouvèu siegue siau e fague respeli la joio e la drudesso dins lis oustau..
A la debuto de Desèmbre, coume sabian pas qunto sarien li règlo pèr la pountannado calendalo e qu'à cha uno falié anula tóuti li fèsto previsto, me sentiéu ges de voio pèr alesti l'oustau coume lou fau chasqu'an : adourna l'aubre de nouvè, faire la crècho, pastissa de bescue.
Mai quouro emé lis enfant, avèn decida de faire coume d'abitudo, ai subran agu mai d'enavans pèr lèu-lèu tout estigança.
A Marsiho, i'a uno santouniero qu'a agu l'idèio de pasta un santoun nouvèu : Deidié Raoult ; n'a fa uno cinquanteno que se soun vendu dins l'afaire de quàuquis ouro.
E nous vaqui aro en 2021, dins l'espèr qu'un vènt meiour boufara pèr faire desparèisse aquèu virus de malur...Fau pas desespera :
I'a ges de marrit tèms que non passo....
Michello
Li noum de famiho
Autro-fes, mai qu'à l'ouro d'aro, li gènt estacavon d'impourtanço à la subre-vivènço de soun noum patrounimi. Es pèr acò que tenien tant à-n-avé de drole, disien : « pèr garda lou noum ».
E me siéu avisado que dins ma famiho de-vers maire, se n'es manca de gaire que lou noum de moun grand vène à desparèisse. Aquéu parèu, Jóusè e sa mouié Anaïs an agu 10 enfant, sièis drole e quatre chato. Sus li sièis drole, un defuntè à la neissènço. L'einat, Lucian, aguè ges d'enfant ; Marcèu aguè dos chato e un drole qu'a agu, éu, dos chato. Pau a agu dous drole, un a agu dous chato, l'autre s'es jamai marida. Louvis aguè qu'un drole que s'es jamai marida e que defuntè encaro proun jouine. Ama aguè dous drole e dous chato ; demié li drole, n'i'a un qu'a jamai agu d'enfant e l'autre defuntè proun jouine, just avans soun maridage. Demié li feleno de mi grand, tóuti o quàsi, an agu de drole, mai poudien pas trasmetre lou noum. Mai ço qu'à-n-aquelo epoco fuguè un escandale, es qu'uno de mi cousino faguè, coume se disié, Pasco avans li Rampau ! Quouro si gènt s'avisèron qu'èro grosso, avié que dès-e-vuech an, la mandèron dins un establissamen pèr « fiho-maire » ounte aprenguè un mestié e abariguè soun drole. Quàuquis annado après, se maridè, e soun ome ié prepausè de recounèisse l'enfant. Elo, vouguè pas, èro pas lou paire. E fin finalo, aquèu drole gardè lou noum de sa maire e sauvè lou patrounime de la famiho !
Pèr resta dins lis istòri de noum, en fasènt un pau de genealougìo, se sian avisa qu'en Prouvènço, èro la coustumo de douna i fremo maridado lou noum « feminisa » de l'espous. Ansin, la mouié de Bertrand se noumavo Bertrando, la de Bertin ié disien Bertino, la fremo de Patin èro la Patino, la de Jourdan èro Jourdano, e aquelo de Berard ié disien Berardo.
E ço que m'agrado, tambèn, es de cerca l'ourigino di noum patrounimi ; D'eisèmple, dins ma famiho, i'avié de Testanière ; es-ti qu'avien la tèsto clafido de nièro ? Segur que li nouma Bontous èron de bràvi gènt, li Fabre èron belèu de manescau, li Fougasso pastejavon, li Jouve èron de gènt jouine, li Poudevigne èron d'óubrié que se lougavon pèr veni pouda . E dequé pensa di Lanternier, Barriot, Nouguier, Lombard, Bouchard, Roure, Blache, Bouscarle, Castagnard, Bouteiller, Bousquet, Bouffier, Escudier, Escoffier, Signoret, Malbosc, Chiron, Graille, Coste, Vergier, Richaud, Taupin, Chivalier, Negre, Estellon, Alazard, Peysson, Flour, etc.... ? Vous laisse chifra.
Michello
Curiouseta arimetico
1 x 8 + 1 = 9
12 x 8 +2 = 98
123 x 8 +3 = 987
1234 x 8 + 4 = 9876
12345 x 8 + 5 = 98765
???????????????????
1234567 x 8 + 7 = 9876543
12345678 x 8 + 8 = 98765432
123456789 x 8 + 9 = 98765421
(Vous demande de devina ço que manco)
Michèu
La toumbo-bello
Pèr la festo di rampau à Carpentras, i’a bèn de tèms d’acò, après la benedicioun de la branqueto cacaluchado de lipetarié tengudo pèr li pichot di riche, à la sourtido de la messo, li pichot paure qu’esperavon sus lou parvis de Sant Siffrèn, se rounsavon sus li rampau bèn prouvesi pèr n’en faire toumba li friandiso en cridant : « Manjo ! » ; acampavon alor tout ço que barrulavo pèr sòu. Acò s’apelavo lou « toumbo-bello ».
Aquéu biais de parteja fuguè lèu enebi pèr la glèiso que i’agradavo pas lou mesclage di branco benesido e di lipetarié.
À l’ouro d’aro, li rampau garni an coumpletamen despareigu e souleto la gleiso pourgis li branco benesido…
Tèste de Ano Laberinto, prepausa pèr Jano-Mario
Aucun commentaire:
Enregistrer un commentaire