Li cat sarien-ti
devengu li « Mèstre d́óu mounde » ?
Un
journaliste afourtiguè'cò i'a quàuqui jour dins un journau. Disié
qu'à l'ouro d'aro i'a 600 milioun de cat sus nosto planeto, que
siguèsson sóuvage o doumesti. Lou cat a pres la plaço dóu chin
qu'èro, i'a gaire, lou meiour ami de l'ome. Es que, fin finalo, lou
cat saup garda soun endependènci, mai saup tambèn viéure dins la
soucieta dis uman, alor que lou chin pòu plus viéure sènso lis
ome.
Li
cat an sachu s'impausa « en douçour », e se faire ama ;
de que dise : ama ? Noun, adoura !
De
cat, se n'en vèi de pertout : au cinema, à la télévisioun
dins de reclamo, dins li libre ; li magasin soun clafi d'eisino
pèr éli. Dins d'ùnis oustau pèr li vièi, an descubert lou poudé
di cat pèr assoula li gènt ; li cat rèndon li relacioun umano
mai eisado, fan de bèn i gènt. A l'ouro d'aro, dins li vilo i'a
meme de « bar à cat » ; li gènt ié vènon à la
begudo e se pauson demié li cat. Pamens, se pòu dire qu'an pas
toujour esta tant ama ! Fuguè un tèms que li cat èron pas
amès dins lis oustau, o soulamen pèr vous apara di gàrri. Li cat
negre èron regarda coume de masc, adusien li malastre, pàuri
malurous ; quant n'i'a agu de crema o de martirisa ?
A
l'ouro d'aro, maugrat touto aquelo devoucioun, i'a encaro de maufatan
que lis agarrisson ; la justiço a pamens previst de li proutegi
en punissènt li brutau que matrasson o mau-traton li bèsti ;
l'article 521-1 dóu code penau es esta redegi pèr acò.
Pèr
reveni au poudé di cat, se pòu demanda coume fan pèr nous pivela
ansin. Li cat soun vertadieramen devengu li rèi, au nostre. An tout
lesi pèr viéure à soun idèio, à soun biais ; lis aman sènso
rèn ié demanda en retour ; dormon sus nòsti lié o sus de
couissin moufle, an de manja requist ( fau vèire lis estagièro di
magasin!) e encaro n'en sian li devoua serviciau : ié croumpa
la mangiho, neteja soun petoulié, ié recassa li niero, ié durbi li
porto o li fenèstro pèr que posquon intra o sourti. E en mai d'acò,
eiserçon sus nautre un tau pivelage que pouden pas nous empacha de
li calineja. Se sias un tant pau que siègue countraria, encagna, lou
calinejage dóu cat saup vous apasima ; an un poudé
estraourdinàri. Em'acò, soun bèu, soun souple, soun pèu sedous
vous fai envejo de lou caressa ; e mau-grat la proussimita de
nòsti vido, an sachu garda soun mistèri. Vous fisson en vous
regardant bèn dins lis iue coume se devinavon vòsti pensamen ;
coumprenon vòstis estat d'amo e soun toujour lèst à nos assoula, e
me dise souvènt que se se metien à parla, aurien de segur forço
causo à nous counta. Nòbli creaturo !
Prenon
en sounjant li nòblis atitudo
Di
grands Esfins* alounga au founs di soulitudo
Que
sèmblon s'endourmi dins de raivo sèns fin..
*Sphynx Michello
NB :
de segur avés recouneigu la darriero estrofo dóu pouèmo de Carle
Baudelaire : Li cat.
Un
pau de tout.....mai pas de peissoun d'Abriéu !
A
l'óusservatòri de Nauto-Prouvènço, an descubert, emé si
telescòpi grandaras, uno eisouplaneto ( planeto en-foro de noste
sistèmo soulàri) e s'atrobo qu'es la tresenco mai procho de nautre.
« Gliese 411 » es soulamen à douge milioun de kiloumètre
dóu soulèu e à gaire mai de vuech annado-lumiero de la terro. E
uno « super-terro », « Gliese 411b », tres
cop mai grosso que nosto boulo terrestro viro à l'entour d'aquelo
pichoto estello roujo, pas tant caudo que lou soulèu ; ié fau
trege jour pèr n'en faire lou tour. Mai alor, i'a belèu de mounde
sus aquelo planeto ! E belèu que tóuti lis istòri d'OVNI que
nous fasien rire, à passa tèms, poudrien èstre vertadiero !
Qu saup ?
Pèr
parla d'aurre, li Souisse an mena d'esperiènci pèr afina de
froumage e an descubert que la musico ié pòu chanja lou goust !
Pèr acò, an istala li moutas d'emental dins de caisso de bos em'uno
eisino que ié difuso de musico. E segound la musico chausido, lou
goust s'atrobo diferènt. Ansin an assaja la musico de Mozart, de roc
o encaro de rap. Pèr lou moutas « temouin », ges de
musico. Aro van estudia la coumpousicioun chimico dóu froumage pèr
vèire se la musico lis a rèndu diferènt.
Ah !
D'aquéli Souisse !
Ai
legi tambèn que lou « berlingau » de Carpentras avié
chanja de man. Lou counfissèire Sèrgi Clavel, de la Quatrenco
generacioun de Counfissèire, a pres la retirado e a vendu soun
afaire.
Se dis
que lou proumié berlingau fuguè crea pèr un cousinié, souto lou
pountificat dóu proumié Papo d'Avignoun,Clemènt V ; mai èro
un proudu counsidera coume medecinau, perfuma emé de caramello e
vèndu pèr lis abouticàri. Pièi en 1844 , un pouèto counfissèire
aguè l'idèio d'alesti li berlingau emé lou sirop d'esgoutamen di
fru counfi.
En 1851, Moussu Eysseric meiourè encaro lou berlingau,
crese qu'es èu que ié baiè sa formo bèn particuliero de
tetraèdre, lou perfumè emé de mento, e ié baiè tambèn sa
coulour roso ; se vendien deja dins de bouito de ferre. Au tèms
de la segoundo guerro moundialo, la fabricacioun dóu berlingau calè,
lou sucre defautavo. Après la guerro, la prouducioun repren emé
cinq counfissèire que fan de berlingau de mant uno coulour perfuma
emé de fru .
Longo
mai à-n-aquéu pichot sucrèu !
Michello
Lou
printèms
Printèms sorgo
d’esperanço
Despièi de-tèms desiran
ta presenço ;
Après un ivèr rufe à
endura,
Nous baies la rasoun
d’espera.
Li bourrioun dis aubre
coumençon de se gounfla.
La sabo que mounto li fara
desbourra.
E li flour tant poulido
Afistoulon la campagno de
si vivi coulour.
L’èr rescaufa pèr lou
soulèu ardènt
Es embauma dóu perfum di
flour.
Lis aucèu reviéuda
coumençon de canta.
Li dindouleto venon
d’arriba.
L’annado coumenço
veramen amé la primo.
Es la reviscoulado de
tóuti li vido :
Vido dis ome, di bèsti,
di planto,
E tamben de l’amour,
obro de la naturo.
Printèms, jouinesso de
l’annado,
Aduso-nous la joio tant
desirado,
Countan sus tu, nous
descourajas pas,
Après tant de misèro,
lou meritan pas !
German Barthe
(reviraduro en prouvènçau
pèr lis escoulan dóu Pont de Garanço)
Pouesio
(Vitour Hugo)
Deman, tre l’aubo,
à l’ouro
ounte la campagno devèn blanquinouso, partirai. Vès, sabe que
m’espères. Anarai pèr la fourest, anarai pèr la mountagno. Pode
pas demoura liuen de tu mai de tèms. Caminarai lis iue fissa sus mi
pensado, sènso rèn vèire en deforo, sènso ausi ges de bru, soul,
incounèigu, l’esquino plegado, li man en crous. Triste lou jour
sara pèr iéu coume la niue. Noun vèirai l’or dóu sèr que
toumbo ni-mai li velo au liuen davalant vers Harfleur. E quouro
arribarai, pausarai sus ta toumbo un amanèu de verd-bouisset e de
brusco flourido.
Jano-Mario
Aucun commentaire:
Enregistrer un commentaire