Lou
bèu tèms di meissoun e dis iero...
Que
de souveni !
En
legissènt li memòri de Frederi Mistral, tout acò m'es revengu...
Revese
encaro la segarello que coupavo li blad madur que roussejavon sus lou
bèu cèu blu de Juliet, n'en fasié de garbo que femo e enfant
acampavon pèr n'en faire de garbeiroun que lis ome cargavon pièi
sus li carreto emé li fourco de bos.
Me
souvene qu'èro mau eisa de marcha dins li restoublo, e en mai d'acò
ié soubravo toujour quàuqui caucido, e encaro mai marrido,
d'auriolo que me groufignavon mi pichot boutèu. Mai pamens ço
qu'amave de faire, enfantouneto, èro de faire s'enfugi li
sautarello ; durbien sis alo, qu bluio, qu roujo, e n'i'avié, e
n'i'avié, n’en sautavo d'en pertout, que semblavon li belugo dóu
fiò...
E
revese encaro lou travai dis iero, li chivau que viravon en tirassant
si rouladou de pèiro, pièi la ventarello que me pivelavo tant
mau-grat la póusso que se n'envoulavo e que me fasié esternuda ;
vese encaro lou bèu blad rous que raiavo dins de grosso saco de telo
groussiero, e la grand que li pedassavo, à l'oumbre dóu tihòu,
tapavo li rousigaduro di gàrri.
A
quàuquis annado d'acò, i'aguè pièi la grosso machino ventrarudo
pausado sus l'iero coume uno grosso bèsti qu'engoulissié li garbo e
n'escupissié d'un coustat lou blad, de l'autre la paio, e tout acò
dins un chafaret dòu tron e dins un revoulun de póusso que mountavo
s'esbrihauda amount bèn aut dins lou cèu.
La
batuso ! S'anounciavo de vilage en vilage e de bastido en
bastido ; i'avié bèn uno deseno d'ome, li bras estroupa, la
tèsto cuberto pèr s'apara de la rajo dóu soulèu, e chascun à
soun obro. Espinchave, pivelado, tout aquéu mecanisme coumplèisse
de rodo, de courrejo e de tijo de ferre tau que de maisse de gigant.
Quouro
èro anounciado, la batuso, li femo se metien en aio : falié
faire manja tóuti aquélis ome, souvènt de jouine, qu'avien
d'apetis...Èro coume uno fèsto, e se manjavo bon : lou
saussissot, lou gau rousti, lou civié de lapin, li liéume dóu
jardin e la frucho fresco ; se bevié tambèn quàuqui bono
boutiho, e tóuti èron galoi, risien, cantavon, fasien de conte de
ma grand la borgno !
Me
souvene que talamen risien que n'i'aguè un que barrulè à la
revèsso emé sa cadiero, e se n'en manquè de gaire que toumbèsso
dins la chaminèio ounte lou fricot fenissié de couire...
Li
meissoun se debanavon au mes de Juliet, qu'èrian deja en vacanço, e
me chalave d'aquéli rejouissènço rustico encò di grand. Me
souvene perèu dóu travai dis iero à Ceresto, encò dóu Fernand,
vesin de la pichoto bastido ounte avian un pichot tenamen, e
subre-tout, l'escour, li lapin, dos o tres cabro pèr lou la. Falié
marcha dès minuto despièi l'oustau, lou camin viravo e mountavo un
pau sus lou cresten de la colo « la Gardeto » . I'anave,
à la bello sesoun, tre la sourtido de l'escolo ; es coume acò
qu'un jour la cabro me rousiguè lou caièr de recitacioun qu'aviéu
pausa sus lou releisset de la citerno.
L'iero
dóu Fernand èro au daut dóu camin, e d'aqui, queto visto ! De
mountagno, de colo, de bos, de gràndis espandido de terro faturado
que chanjavon de coulour au debana di sesoun. Eilalin, à man drecho,
la mountagno de Luro que visajavo lou grand Luberoun. E me ramente
que li vièi disien : « Quand Luro a soun capèu e
Luberoun soun mantèu, tant pourrié èstre de plueio coume de nèu. »
Coume
tout acò es liuen dins lou treboulun dis an !
A
l'ouro d'aro, li fèsto meissounenco soun plus que de souveni pèr
li « seniour » ! Li meissoun soun facho à la
lèsto. En Juliet, chasqu'an, dins li champ que s'estalouiron en fàci
de moun oustau, de l'autro man dóu canau, l'ause arriba, la grosso
sautarello verdo, avans que de la vèire. T'aubouro uno póusso qu'es
pas de dire, e dins un vira d'iue, lou champ es meissouna ;
vuejo soun gran dins un camioun qu'espèro au bord dóu camin, e,
passo que t'ai vist !
Michello
Lou
parla dóu païs....
Uno
amigo me countè, i'a gaire d'acò, uno istòri estraourdinàri :
Soun
grand èro nascu à Pont de Sorgo, e avié degu mounta à Paris pèr
lou travai. Aqui, s'èro marida e aguèron de drole. Pièi, pèr
resoun de santa, lou mege ié counseiè d'ana s'istala à la
campagno. Alor mudèron si catoun e s'istalèron dins l'Iouno.
Un
jour, èro deja un pau vièi, toumbè malaut ( bèn fatiga coume
dison li bon prouvençau!) ; toumbè meme dins lou subé. Tóuti
cresien qu' anavo faire soun darrié badai, mai lou vaqui que se
dereviho ! E li gènt de l'espitau sounèron sa mouié fin que
venguèsse lèu : s'èro mes à parla uno lengo estrangièro e
degun lou poudié coumprene!
Èu
que despièi d'annado de tèms avié leissa soun rode de neissènço,
lou vaqui que s'èro mes à parla prouvençau !
Coume
lou disié Mistral : « E lou parla de nòsti maire,
poudrian
nàutri l'oublida ? »
Michello
