La crounico dóu mes de Nouvèmbre
Nous vaqui bèn à l'autouno !
Dissate passa avèn agu un pau de plueio qu'a pas fa de mau, em'un ventaras, un marin dóu tron!Li meteouroulougiste s'èron engana : nous avien anouncia de glavas de plueio touto la journado e finalamen a plóugu que lou matin, e pas tant qu'acò. Vuei que sian lou jour de la Toussant, adematin a fa uno bono plueio.
La naturo a mai desplega si dauraduro e touto sa paleto de coulour autounenco. Quet chale !
Tra la fenèstro vese li rai dóu soulèu esquiha sus li fueio de la figuiero pèr s'ana miraia dins l'aigo, e l'aigo n'en remando si rebat sus li fueio dis aubre que lou ventoulet fai tout just ferni ; aquéli rebat mouvedis semblon un caleïdouscope gigant, d'image que se fan e se desfan de longo ; poulit espetacle !
Acò fai un pau óublida lou rèsto... Lou gouvèr que vòu perlounga lou passo-sanitàri jusqu'à l'estiéu venènt... Lou menistre de la santa èro tout fièr d'anouncia la descuberto d'un nouvèu remèdi contro lou Couvide ; mai au dire d'ùni saberu que soun pas dins de « tuert d'interès », sarié un remèdi belèu un pau « dangeirous » e bèn carivènd !
Dimènche à Sant Savournin i'avié lou councous de la mai grosso coucourdo ; m'ère facho marca pèr ié participa, à la primo, e baiavon en tóuti un saquetoun de grano de coucourdo de la varieta « coucourdo muscado ». Dins lou miéu i'avié quatre grano : uno avié si dos pèu que se toucavon, rès dedins pèr greia. N'ai samena tres. Sus li tres, n'i'a que dos qu'an greia ; quouro li plantun aguèron soun parèu de fueio, n'i'avié un qu'èro un pau feblot, e un cacalaus aguè lèu fa de l'empassa.
Me restavo un plantun qu'istalère au jardin dins un poulit rode, emé de bon femié, bèn arrousa. Aguè lèu fa de s'espandi em'uno tijo que semblavo uno serp e de fueio quasimèn tant grosso que d'auriho d'elefant. La planto faguè lèu lou tour de l'endré pièi se boutè à flouri... mai rèn que de flour masclo ! Ère à mand de la derraba... Pièi un jour m'avisère qu'uno segoundo tijo s'èro enfusado souto uno grosso planto de flour e que banejavo de l'autre coustat, mai un pau à l'oumbro. Mai es elo qu'avié chausi lou rode pèr enfin espandi si flour femelo. Tres bèlli flour que se mudèron en pichòti coucourdo e cade jour n'en survihave lou crèis ; mai uno aguè lèu fa de se seca e la segoundo fuguè aneientido pèr li poutoun d'un gros cacalaus. N'en soubrè pamens uno, mai estènt qu'èro dins un rode un pau souloumbrous venguè pas tant grosso qu'acò e me faguè pas gagna lou councous. Aquelo que daverè lou proumié prèmi fasié 137 centimètre de circounferènci ; poulido coucourdo !
Aquesti jour fasié un tèms de calandro : bon soulèu, ges de vènt, e mi tartugo , un pau desvariado arribavon pas à s'endourmi ; lou soulèu lis atrivavo deforo e manjavon gaire. Mai despièi dous o tres jour que lou tèms s'es afrejouli an feni pèr plega parpello pèr uno niue de sièis mes.
I'a de jour qu'amariéu bèn d'èstre uno tartugo….
Michello
La faïençarié d'art, de Moustié à Marsiho..
Tre lou reinage de Louvis lou XIVèn, de fabrico de faïenço d'art an espeli dins lou miejour, e lou gàubi de Clerissy, mèstre faïencié mai tambèn de Viry, pintre, an countribuï à la renoumado de la faïençarié prouvençalo. Èro lou cèu-sin de l'art de la ceramico franceso. Aquéli dos famiho de terraié istalado au Moustié despièi de tèms an pau à cha pau meioura soun obro ; un bon prèire d'un ordre mounasti italian qu'èro istala au Moustié i'aurié trasmès la recèto de l'esmaut estanifèr.
La famiho Clerissy estiganço alor la glaçaduro à l'estam que recuerb li terraio, e ei la famiho Viry, mèstre pintre de paire en fiéu que fan lou renoum e la bèuta di decor. S'ispiron di pintre e gravaire flourentin coume Tempesta : de sceno de casso, pièi de sceno d'ispiracioun biblico dins de toun de blu. Pièi van crea de moutiéu de flour de l'Ouriènt-Estrèmo. Fan de friso emé de grifoun alu que s'afrounton emé de bèsti de casso. Dins aquéli decor s'atrobon encaro de lioun, de fueio d'acanto. Fargon perèu de vas de farmacìo.
Au siècle XVIIèn lou dessinatour Berain qu'a uno cargo impourtanto à la court dóu rèi Louvis lou XIVèn s'ispiro de la reneissènço italiano pèr crea de nouvèu decor.
Un dis enfant Clerissy s'èro establi à Marsiho ( à Sant Jan dóu Desert) e aperaqui vers 1725, de la parentèlo di Clerissy van crea d'àutri faïençarié au Moustié, mai li moutiéu soun mens riche.. En 1738, ei la debuto de la poulicrounìo : lou jauno adus la coulour dóu miejour emé lou verd, e lou blu refrejo l'atmousfèro. I'a encaro un verd founsa e lou manganèso.
En 1783, la fabrico de Pèire Clerissy sara vendudo à Jòusè Fouque.
Uno autro famiho de faïencié, lis Olerys Laugier van proudurre d'àutri decor pèr si creacioun : de bouquet, de garlando, de courouno, e meme de flour de tartifle. que soun à la modo en Espagno.
Pièi se van ispira di pinturo muralo descuberto dins de baumo au siècle XVèn, dóu tèms di cavage rouman pèr crea de moutiéu « groutesc » emé de persounage eisouti, d'indian à plumo, dec ambarut nanet, de persounage guerrié, de musician, de singe, d'ase, de chin. Pièi vendra la modo
di decor « i marchand »dis ativeta dóu port, pièi de sceno mitoulugico. La fabrico Fouque-Pelloquin vai crea de decor de sceno biblico mai tambèn de decor de simbole massouni à la fin dis annado 1700.
A-n-aquelo epoco l'art de la faïenço fai flòri dins touto la Prouvenço ounte mant uno famiho se soun istalado : Marsiho, Sant Jan dóu Desert, Varage, Alemagno en Prouvenço, la Tourre d'Aigo, emai dins lou Langadò: Nime, Mount-Pelié, Narbouno.
Michello
Sourso : Istòri de la faïenço franceso de Dorothée Guillemé Brulon.
